SERIKALI INAJIVUNIA MCHANGO WA WANAWAKE KWA TAIFA

Posted on: June 27th, 2018

Na. Ofisi ya Mkuu wa Mkoa, Iringa

Serikali inajivunia mchango wa wanawake katika kuleta maendeleo ya familia na taifa kutokana na sera nzuri zilizowekwa nchini.

Kauli hiyo ilitolewa na mkuu wa Mkoa wa Iringa, Amina Masenza alipokuwa akifungua mafunzo ya kuwajengea uwezo makandarasi wamawake katika ushiriki kwenye kazi za ujenzi na matengenezo ya barabara katika ukumbi wa chuo cha VETA mjini Iringa.

“Ni jambo la kujivunia kuwa wanawake wa nyanda za juu kusini

mnajitoa na kuthubutu kwa kadiri muwezavyo kuleta maendeleo

yenu na taifa letu kwa jumla. Napenda kuwahakikishia kuwa ni sera

ya Serikali yetu kuwahamasisha wanawake kushiriki katika kazi za

ujenzi wa barabara” alisema Masenza. Aidha, aliwashauri

wanawake kuchangamkia fursa za miradi ya barabara ili

kuwaongezea mapato. Kwa kufanya hivyo ustawi na kipato kwa

familia zenu na jamii kwa ujumla utaongezeka na hatimaye

kutokomeza umaskini, aliongeza.

Mkuu wa Mkoa alisema kuwa mafunzo hayo yatawajengea uwezo katika maeneo ya uongozi kama wamiliki wa kampuni kwa kuwapa uwezo wa kuongoza wafanyakazi na vibarua. Aidha, alisema kuwa mafunzo hayo yatawasaidia kutunza hesabu na fedha ili kutambua faida na hasara mapema.

Mafunzo ya siku tano ya kuwajengea uwezo makandarasi wanawake yalihudhuriwa na washiriki kutoka mikoa ya Iringa, Ruvuma, Njombe, Mbeya, Rukwa na Katavi. Aidha, yalilenga kuwajengea uwezo na uthubutu makandarasi wanawake kushiriki katika kazi za ujenzi na matengenezo ya barabara.

=30=